25
Ibintu biboneye n’ibigayitse
1Hari ibintu bitatu umutima wanjye wifuza,
bigashimisha Imana n’abantu:
ubwumvikane mu bavandimwe, ubucuti mu baturanyi,
n’umubano mwiza w’umugabo n’umugore.
2Hari n’amoko atatu y’abantu, umutima wanjye wazinutswe,
n’imibereho yabo ikantera umujinya:
abo ni umukene w’umwirasi, umukire w’umubeshyi,
cyangwa umusaza w’umusambanyi akaba n’igicucu.
Ikamba ry’abasaza
3Niba mu buto bwawe nta cyo wigeze uhunika,
uzatunga iki mu busaza bwawe?
4Byizihira abasaza kumenya gushyira mu gaciro,
nk’uko abakuru na bo baberwa no gutanga inama!
5Mbega ukuntu ubuhanga bwizihiye abasaza,
kimwe n’ubushishozi n’inama ku banyamurava!
6Ikamba ry’abasaza, ni uko ari inararibonye,
naho ishema ryabo, ni ugutinya Uhoraho.
Ibintu icyenda bitera ubwuzu
7Hari ibintu icyenda ntekereza mu mutima wanjye,
ngasanga biteye ubwuzu,
icya cumi na cyo reka nkivugishe ururimi rwanjye.
Hahirwa umuntu ushimishwa n’abana be,
akanabona abanzi be barimbuka akiriho.
8Hahirwa umuntu ubana n’umugore w’umutima,
akaba ataracumura ku rurimi rwe,
kandi ntabe yaragaragiye udakwiye kumuhaka!
9Hahirwa umuntu waronse ubwitonzi,
akanabugeza ku bafite amatwi amwumva!
10Uwaronse ubuhanga aba akomeye!
Ariko ntaba asumba utinya Uhoraho.
11Gutinya Uhoraho bisumba byose,
none se ubyibandaho, wamunganya nde?
Umugore gito
13Ibikomere byose birihanganirwa, uretse ibyo ku mutima!
Ubugome bwose burihanganirwa, uretse ubw’umugore!
14Ibyago byose birihanganirwa, uretse ibivuye ku banzi!
Akarengane kose karihanganirwa, uretse agatewe n’umwanzi.
15Nta bumara bukara kurusha ubw’inzoka,
nta n’umujinya mubi kurenza uw’umugore.
16Nahitamo guturana n’intare cyangwa inzoka nini,
aho kubana n’umugore gito.
17Ubugome bw’umugore bumuhindura isura,
akijima agasa n’ikirura.
18Umugabo we yicarana na bagenzi be,
akaboroga ndetse atabishaka.
19Uburyarya bwose buba budakabije ugereranije n’ubw’umugore;
amagorwa y’umunyabyaha arakamuhama.
20Umugore w’indondogozi avuna umugabo utuza,
uko umusozi w’urusenyi unyereza umusaza.
21Ntuzashukwe n’uburanga bw’umugore,
ntihazagire n’umwe ukurarura.
22Iyo umugore ari we utegeka umugabo,
usanga biteye umujinya, ishozi n’ikimwaro cyinshi.
23Umugore gito ashavuza umutima,
akawukomeretsa, kandi akawutera gusuherwa;
umugore udashakira umugabo we amahoro
amumaramo imbaraga, akamuca intege.
24Icyaha cyatangiranye n’umugore25.24 cyatangiranye n’umugore: Mwene Siraki aracira amarenga ku cyaha cy’inkomoko (Intg 3,1–6). Muri 2 Kor 11,3 na 1 Tim 2,14, Pawulo Mutagatifu yibanda ku ruhare umugore yagize kuri icyo cyaha, ariko mu Intg 3,6 na Rom 5,12 bakibanda ku ruhare rw’umugabo (Adamu). Mu by’ukuri ariko, ibyo bitsina byombi ntibikwiye kwitana bamwana.,
kandi ni we waduteye kuzapfa twese.
25Uko wima amazi aho yamenera
uzabe ari ko wangira umugore kurondogora.
26Natitwara uko ubishaka,
muzatandukane, umusende25.26 umusende: tuzi ko mu Mategeko ya Musa byari byemewe ko umugabo yasenda umugore we (Ivug 24,1–4). Ariko Yezu we azavuga ko ibyo babyemerewe na Musa kubera umutima wabo udashobotse, maze ahamye ko abashakanye batagomba gutandukana (Mt 19,3–9; reba na Efz 5,31)..