Ibaruwa ya kabiri Pawulo intumwa yandikiye Abanyakorinti
IJAMBO RY’IBANZE
Umwanya w’iyi baruwa mu kubaho kwa Pawulo
Umwaka utari wanashira Pawulo yandikiye Abanyakorinti ibaruwa ya mbere, yumva ko agomba kongera kubandikira. Iryo koraniro ntirisiba kumutera ibibazo!
Icyo gihe Pawulo yari muri Efezi, nuko hirya no hino bakaza kumubwira ko abakristu b’i Korinti bibera mu ntonganya no mu mashyari. Abenshi bararikiye kudohoka ku kwemera bamaze gushyikirizwa; abandi ndetse barashaka kwisubirira ku mihango yabo ya kiyahudi (11,21–23). Pawulo baramwibasiye, baramunnyega bikabije (10,10); ndetse hari n’uwatinyutse aramutuka rwose (2,5–11). Hagati aho Abanyakorinti bari biyemeje guterateranya imfashanyo bazoherereza abavandimwe b’i Yeruzalemu, bari mu bukene bukabije; cyakora ubwo buntu bwasaga n’ubwaheze mu magambo gusa (8,1–24).
Pawulo ntashobora gutererana iryo koraniro n’ubwo riruhije. Ababazwa n’uguhindagurika n’ubwirasi bwa bamwe (4,10), nuko mu kubabwira na we akabagenuriraho (11,7; 12,13), ariko mu byo abacyurira byose (11,3) akaba ashaka kubagirira neza (11,8–13). Abakunda bya kibyeyi (6,13), mbese abafitiye ubukundwakaze nk’ubwo umusore agirira umugeni we (11,1–2).
Ibyo bamukemangaho bituma yivuga rwose uwo ari we, n’uburyo akoresha yamamaza Inkuru Nziza. Ni na bwo tumenyeraho imirimo ye, imibabaro ye, amakuba yagize n’ibyo yemeye guhara agirira Kristu (6,4–10; 11,23–27), n’ubwo yari umunyantege nke (11,7). Kristu ubwe ni we umwikomereje.
Kuba intumwa ya Yezu Kristu bivuga iki?
Umurimo Imana yashinze Pawulo ni ukuba intumwa ya Yezu Kristu (1,1). Pawulo yumva ko agomba gusobanurira Abanyakorinti birambuye «kuba intumwa» icyo ari cyo: si ikindi kindi kitari ugutunganya umugambi w’Imana wo gukiza abantu, dukomeza umurimo wa Kristu wazutse. Imana Data ikoresheje Kristu na Roho Mutagatifu, yitaye cyane ku buzima bw’uwemera wese, akita no ku ikoraniro ryose ry’abemera, igira ngo buri wese akizwe. N’ubwo Pawulo ari umunyantege nke, nk’uko yigereranya n’akabindi kameneka ubusa (4,7), mu bimugwirira, mu bamurwanya no mu bukene bwe, ni we nyamara ubagezaho iby’uko gukizwa n’umubano w’Imana, ku bemeye bose.
Pawulo yumva ko umurimo we wa gitumwa agomba kuwutunganyiriza ikoraniro. Ni ubugabuzi bw’Isezerano Rishya, bwaje gusimbura irya kera, bukaba butarangwa no gukurikiza by’umurato akamenyero k’abakera, ahubwo bukaba burangwa n’ingabire ya Roho Mutagatifu, ukorera mu mitima. Ni kuri ubwo buryo Kristu utarangwagaho icyaha, yatwunze n’Imana (5,11–21)
Imfashanyo igenewe abavandimwe b’i Yeruzalemu
Pawulo aravuga kandi n’ibyerekeye imfashanyo ateganya kuzaka muri za Kiliziya zose ngo atabare abavandimwe b’i Yeruzalemu bari mu butindahare. Arasanga ari ngombwa gufasha iyo Kiliziya yabyaye izindi zose, bityo bakayibishimira. Uretse ibyo, gushyira hamwe izo mfashanyo zivuye muri Kiliziya zose ni nk’ikimenyetso kigaragaza ubumwe bafitanye: n’ubwo umuryango mushya w’Imana ugizwe n’Abayahudi n’abanyamahanga, ni umwe rukumbi! Reba imitwe 8–9.
Ngizo ingingo ebyiri z’ingenzi ziri muri iyi baruwa. Hari n’ibindi bibazo byinshi twashobora kwibaza, n’inyigisho zindi zikwiye kwitabwaho cyane, ariko muri iri jambo ry’ibanze rigufiya, nta bwo dushobora kubitindaho.
Icy’ingenzi ni uko twasoma iyi baruwa yose twitonze, tugatangarira ishyaka n’ubwuzu dusangamo, bituma twiyumvisha ukuntu Roho Mutagatifu yakongeje urukundo mu mutima wa Pawulo, intumwa ya Yezu Kristu.