5
Nta mahoro y’umukire n’umunyabyaha
1Ntuzishingikirize umutungo wawe,
ntuzibwire ngo «Mfite ibimpagije.»
2Ntukishinge ibyifuzo n’imbaraga zawe,
ngo ukurikize irari ry’umutima wawe.
3Ntukavuge ngo «Ni nde uzantegeka?»
Kuko, nta shiti, Uhoraho yazaguhana.
4Ntukavuge ngo «Ko nacumuye byantwaye iki?»
kuko Uhoraho azi kwihangana5.4 azi kwihangana: ni koko Imana ihora ihoze..
5Ntuziringire imbabazi ze,
ngo wungikanye ibyaha.
6Ntukibwire ngo «Imbabazi ze ni nyinshi,
azambabarira umurundo w’ibyaha nakoze»;
yego, arangwa n’impuhwe, ariko agira n’umujinya,
kandi uburakari bwe burondera abanyabyaha.
7Ntuzatindiganye mu kugarukira Uhoraho,
ngo uhore ubyimurira ejo hazaza,
kuko uburakari bw’Uhoraho buzagurumana bugutunguye,
maze igihe cyo guhanwa nikigera, uzarimbuke.
8Ntukiringire ubukungu bw’amahugu,
kuko amakuba naza, nta cyo buzakumarira.
Kwirinda uburyarya
9Ntukagosore utarebye aho umuyaga uturuka,
cyangwa ngo unyure mu mayira ubonye yose;
ibyo ni iby’umunyabyaha urangwa n’uburyarya.
10Ujye ugira ibitekerezo bihamye,
kandi uvuge ijambo uzasubiraho.
11Uzajye ushishikarira kumva,
ariko nujya kuvuga, ubanze witonde.
12Niba hari icyo uzi, subiza mugenzi wawe,
ariko niba nta cyo, icecekere.
13Ikuzo n’umugayo, byombi biba mu magambo,
kandi ururimi rw’umuntu ni rwo rutuma arimbuka.
14Uzirinde ko bakwita inzimuzi,
cyangwa ngo amagambo yawe agire uwo abera umutego,
kuko igisambo gikorwa n’isoni,
n’indyarya igahanwa bikomeye.
15Ntugacumure haba mu bikomeye, haba no mu byoroshye,
kandi uwo mwari incuti, ntimuzahinduke abanzi.