10
Abategetsi
1Umutware w’umunyabuhanga ajijura imbaga ye,
kandi ubutegetsi bw’umunyabwenge burangwa n’umurava.
2Uko umutegetsi ateye, ni na ko ibyegera bye bimera,
imyifatire y’umutware w’umugi, ni yo abaturage bakurikiza.
3Umwami w’injiji aroha imbaga ye,
kandi umugi ukomezwa n’ubwenge bw’abawutegeka.
4Ingoma zose zo ku isi ziri mu kiganza cy’Uhoraho,
iyo igihe kigeze, azihitiramo uzazigirira akamaro.
5Amahirwe y’umuntu ari mu kiganza cy’Uhoraho,
ni we umutegetsi akomoraho ikuzo rye.
Kwirinda ubwirasi
6Ntuzagirire inzika mugenzi wawe,
kabone n’iyo yagucumuraho ate,
kandi uzirinde kugira icyo ukorana impirita n’umujinya.
7Ubwirasi butera ishozi Uhoraho n’abantu,
ari we, ari na bo, banga icyitwa akarengane cyose.
8Ubwami buva mu gihugu bujya mu kindi,
kubera akarengane, urugomo n’umurengwe n’ubukire.
9Umuntu yakwiratana iki kandi ari igitaka n’ivu?
N’iyo akiri muzima, amara ye aba yuzuyemo ibyaboze.
10Indwara itinze, inanira muganga,
uwari umwami none, ejo akazapfa10.10 ejo akazapfa: aha ngaha umwanditsi arasa n’uhamya ko hari indwara zinanira umuvuzi, n’ubwo yaba abizobereyemo ate (reba 38,1–15); bityo rero n’ibikomerezwa bikaba bidateze gusimbuka urupfu, rwica abantu bose..
11Iyo umuntu apfuye, umunani asigarana
ni imonyo, ibishorobwa n’inyo.
12Ubwirasi busatira umuntu iyo yihungije Uhoraho,
n’iyo umutima we witanyije n’Uwawuremye.
13Koko rero, intangiriro y’ubwirasi ni icyaha,
ukihambiriyeho, agusha ishyano;
ni yo mpamvu Uhoraho yahanishije ibyago bikomeye abirasi,
hanyuma akabatsemba10.13 hanyuma akabatsemba: Bibiliya itanga ingero nyinshi za bene ibyo bihano bigenewe abirasi: nk’isenywa ry’umunara wa Babeli (Intg 11,1–9), ibyago bya Misiri (Iyim 7–11), n’ukuneshwa kw’ingabo za Senakeribu (2 Bami 19,35). Muri rusange rero dushobora no gutekereza n’ibindi bihano by’abanyabyaha nk’ibyo: umwuzure (Intg 6–9); isenywa rya Sodoma na Gomora (Intg 19), n’ibindi . . . .
14Uhoraho yahanantuye abakomeye abakura ku ntebe zabo,
yimika abiyoroshya mu mwanya wabo.
15Uhoraho yaranduye imizi y’abirasi,
ashyira abiyoroshya mu kigwi cyabo.
16Uhoraho yarimbuye ibihugu by’abirasi,
abiyogoza abihereye ku muzi;
17bimwe yabihinduye ubutayu, atsemba abantu baho,
maze atuma bibagirana ku isi.
18Nta bwo ubwirasi bwaremewe abantu,
n’umujinya usenya ntubereye abavuka ku mugore.
Abantu bakwiye icyubahiro, n’abakwiye gusuzugurwa
19Ubwoko bwubahwa ni ubuhe? Ni ubwa kamere muntu.
Ubwoko bwubahwa ni ubuhe? Ni ubw’abatinya Uhoraho.
Ubwoko busuzugurwa ni ubuhe? Ni ubwa kamere muntu.
Ubwoko busuzugurwa ni ubuhe? Ni ubw’abica amategeko.
20Umutware yubahwa mu bavandimwe be,
n’abatinya Uhoraho bakubahwa imbere ye.
22Ari umukire, ari ikirangirire cyangwa umukene,
ishema ryabo bose ni ugutinya Uhoraho.
23Ntibiboneye gusuzugura umukene w’umunyabwenge,
nk’uko nanone bidakwiye kubahiriza umunyabyaha.
24Ibikomerezwa, abacamanza, n’abakire, bose bahabwa ikuzo,
ariko muri bo nta we uruta utinya Uhoraho.
25Umugaragu w’umunyabuhanga azagaragirwa n’abantu bigenga,
kandi nta muntu ujijutse uzabyinubira.
Kwicisha bugufi no kwiyubaha
26Ntukigire umunyabuhanga igihe uri ku murimo ushinzwe,
kandi ntukishimagize ubutindi bwakugarije.
27Uwakoranye umwete akaronka ibintu umudendezo
aruta ugenda yishongora kandi atagira ikimutunga.
28Mwana wanjye, ujye wishimagiza mu rugero,
kandi wishime ukurikije icyo wamaze.
29Uwiyononera ubwe, ni nde wamushima?
Uwisuzugura ubwe, ni nde wamurata?
30Umukene ashimirwa ubumenyi bwe,
naho umukire agashimirwa umutungo we.
31Ushimwa akiri umukene, yakira hacura iki?
Uwo basuzugura akize se, nakena ntibazarushaho?