Ibaruwa Pawulo intumwa yandikiye Abanyakolosi
IJAMBO RY’IBANZE
Umwanya w’iyi baruwa mu kubaho kwa Pawulo
Kolosi wari umugi woroheje uri mu gihugu rwagati nko muri km 200 mu burasirazuba bwa Efezi (reba ku ikarita). Hari itorero ry’abakristu, ritashinzwe na Pawulo, ahubwo ryatangijwe n’umwe mu bigishwa be witwa Epafurasi (Kol 1,7). Ibyo byabaye mu gihe Pawulo na we yigishaga Efezi, ahagana mu myaka ya 53–56.
Igihe Pawulo yari afungiye i Kayizareya cyangwa se i Roma (reba Intu 24,27—28.30), ni bwo Epafurasi yaje kumusura, ariko kandi anamumenyesha akaga iyo Kiliziya ikivuka y’i Kolosi iterwa n’abamamaza inyigisho z’ubuhendanyi. Zari impaka z’urudaca zerekeye roho mbi n’inziza, zitwa ibinyabubasha, inganji, ibikomangoma, n’ibihangange (1,16—2,15), mbese zisa nk’aho ari zo zisumba Kristu. Hari n’izindi nyigisho z’amafuti zisobanura ibyerekeye ibiribwa n’ibinyobwa, zigasobanura kandi n’ibyerekeye iminsi myiza n’imibi, imboneko z’ukwezi n’amasabato (2,16–23).
Iyi baruwa igamije iki?
Nta washidikanya ko ari Epafurasi wasabye Pawulo kwandikira Abanyakolosi iyi baruwa. Arayihamyamo koko umwanya w’ikirenga, Kristu usumba byose afite. Ni we wenyine ufite umwanya iruhande rw’Imana, mu byaremwe byose, kandi ni na we ubibeshejeho. Ni we Mukiza wenyine Rukumbi. Ubugingo bushya bukwiye umukristu ntabukesha gukabiriza mu kwigomwa, ahubwo abukesha kwiyunga na Kristu, no gukomera mu Kiliziya, ari yo mubiri we, no kwitagatifuza mu mibereho ye yose.
Tushiko (4,7) umukristu wo muri ako karere, wabanaga na Pawulo, ni we ushinzwe kugeza iyi baruwa ku bo igenewe.
Ingingo zimwe zihariye mu byo iyi baruwa itwigisha
Ku buryo budasubirwaho, Pawulo arahamya umwanya wihariye, Kristu afite mu mugambi w’Imana. Ni na ho Pawulo ashingira igisingizo kitagira uko gisa kirata Kristu, We shusho ry’Imana itagaragara, umuvukambere ku cyitwa ikiremwa cyose, ari We ibiboneka n’ibitaboneka byaremewemo, akaba ari na We watwunze n’Imana ku bw’amaraso ye yameneye ku musaraba (1,15–20). Niba dufitanye ubumwe na We, tuba tugobotowe rwose ku migenzereze y’igenywa, y’inyigisho ziyobya z’abiyita abahanga, n’indi mihango yose yerekeye ibiribwa n’ibinyobwa (2,6–23).
Tugomba no kuzirikana ibyo Pawulo atubwira byerekeye gupfa ku migenzo yose ya kera (3,5–9), ngo dushobore kubaho nk’abantu bashya, bazukanye na Kristu (3,5–17).
Tugomba no guhugukira inyigisho Pawulo aduha yerekeye kubana neza gikristu mu rugo, kubahana no gukundana ku bantu babana (3,18—4,1).
Kimwe n’andi mabaruwa yose ya Pawulo, iyi na yo yandikiwe Abanyakolosi, iradushinga ukwemera Kristu nyakuri, We dukesha ubwigenge nyabwo bwo gukorera Imana.