Ibaruwa ya kabiri ya Petero
IJAMBO RY’IBANZE
Umwanditsi
Iyi baruwa ya kabiri yigaragaza nk’umurage wa Simoni Petero, intumwa ya Yezu Kristu. Amaze kwiyumvamo ko agiye gupfa, asanga ari ngombwa gushishikariza abavandimwe be gukomeza kuba indahemuka ku kuri (1,1; 1,12–15); ngiyo impamvu ituma yongera kubandikira (3,1). Nyamara biranashoboka ko iyi baruwa itanditswe na Petero ubwe, ahubwo ko yaba yaranditswe n’umwe mu bigishwa be, akayitirira umwigisha we, akurikije ibyariho icyo gihe, ndetse wenda na nyuma y’urupfu rwa Petero.
Inyigisho z’ingenzi ziri muri iyi baruwa
Iyi baruma yagenewe ku buryo bwihariye gushishikariza abo yohererejwe — tutazi neza abo ari bo — gukomeza kuba indahemuka ku butorwe bwabo n’ihamagarwa bahawe n’Imana, ari na byo bakesha «kuba barinjijwe muri kamere y’Imana» (1,4), nk’uko umwanditsi adashidikanya kubivuga.
Kugira ngo tubigereho, ni ngombwa kwishingikiriza ku buhamya bw’ababonye Nyagasani Yezu Kristu (1,16–18), no ku Byanditswe bitagatifu. Muri 1,20–21, umwanditsi arasobanura ku buryo bugaragara inkomoko y’ubwo bubasha bw’Ibyanditswe: ababyanditse bari Abahanuzi, «abantu bayobowe na Roho Mutagatifu, batumwe n’Imana».
Mu mutwe wa 2, umwanditsi yihanangiriza ku buryo burambuye abasomyi b’iyi baruwa ye, kwirinda abigishabinyoma, akagaragaza mu magambo akomeye cyane ububi bwabo.
Hanyuma agasobanura impamvu Umunsi wa Nyagasani utaragera (3,1–13). Ibyo ari byo byose, tugomba gutegerezanya icyizere «ijuru rishya n’isi nshya, aho ubutungane buzatura» (3,13). Koko, ntihabuze abavuga ngo hashize imyaka myinshi dutegereje Umunsi w’ihindukira rya Nyagasani, ariko ntugere (3,4); nyamara iyo tuvuga dutyo twibagirwa ko «kuri Nyagasani umunsi umwe ari nk’imyaka igihumbi, n’imyaka igihumbi ikaba nk’umunsi umwe» (3,8). Dukomeze rero twizere kandi tumenye ko Nyagasani yiyumanganya, ari ukugira ngo ahe buri wese uburyo bwo kwisubiraho (3,9).
Ikindi gikwiye kwitabwaho, ni icyo dusanga muri 3,15–16: muri iyi ngingo umwanditsi avuga ku byerekeye amabaruwa ya Pawulo Mutagatifu, yo yatangiye kumenywa neza n’abakristu bose, kandi bakayafata nk’agize igice cy’Ibyanditswe bitagatifu. Nyamara ariko, ni ngombwa kwitonda ngo tutayumva uko atari.
Ngizo inyigisho zidufitiye akamaro twebwe ab’iki gihe.
