Ibaruwa ya mbere ya Petero
IJAMBO RY’IBANZE
Umwanditsi
Dukurikije ibyanditse muri iyi baruwa, dusanga rwose yaranditswe na Petero, «intumwa ya Yezu Kristu» (1,1), «umukuru w’ikoraniro» n’» umuhamya w’ububabare bwa Kristu» (5,1); ibaruwa ye yayanditse yifashishije Silivani (5,12), ari kumwe kandi na Mariko «umwana we» (5,13).
Uruhererekane rw’abakristu, iyi baruwa ruyitirira Petero, umutware w’intumwa. Yayandikiye i Roma (ari yo ahimba «Babiloni» 5,13), ari na ho yapfiriye ahowe Kristu ku ngoma ya Neroni (muri 64 cyangwa 67), nk’uko byemezwa n’uruhererekane rw’abakristu. Iyi baruwa yohererejwe za Kiliziya nyinshi zo muri Aziya (1,1); birashoboka ko Petero yaba yarazisuye mbere yo kujya i Roma.
Icyo iyi baruwa igamije
Icyo Petero aharanira, ni ugushyigikira ukwemera kw’abakristu bari mu bigeragezo by’amoko yose; ibitutsi cyangwa imibereho mibi byari bibashikamiye. Muri iyi baruwa rero, usangamo amagambo anyuranye yo gushishikaza abari mu kaga, agenda abisikana ariko mu buryo butavanguye. Dore ingero zimwe na zimwe z’izo nama abagira.
Ni ngombwa kwiyumanganya gitwari mu bigeragezo, nk’uko Kristu yabiduhayemo urugero (2,21–25; 3,18; 4,1). Abakristu na bo bagomba kwihanganira ububabare nka We, bakaba bahirwa niba imibabaro ituruka ku kwemera kwabo no ku myifatire yabo myiza (2,19–25; 3,14–17; 4,12–19).
Inabi bagirirwa yiturwe ineza, urukundo, ukumvira abategetsi (2,13–17), no kwicisha bugufi imbere ya bose (4,7–11; 4,19).
Usoma iyi baruwa atangazwa cyane no kubona ukuntu inama z’ingirakamaro zijyana n’inyigisho z’amahame y’ingenzi y’ubukristu. Uzabonamo ingingo nyinshi zerekeye batisimu (1,3; 1,23; 2,2; 3,21); hakabamo n’inyigisho ihebuje ku byerekeye agaciro nyako k’abakristu, bo «bwoko bwatoranyijwe, imbaga y’abaherezagitambo ba cyami, ihanga ritagatifu», ari bo kandi «amabuye mazima yubakwamo Ingoro ya Roho», bakaba bagenewe «kwituraho ibitambo bishimisha Imana ku bwa Yezu Kristu» (2,4–10).
Uzasangamo kandi ingingo zishishikariza abakristu kubaho nk’abagenzi kuri iyi si (1,1; 2,11), aho tumara igihe gito (1,6; 1,17), dutegereje umurage wo mu ijuru (1,4). Uzasangamo n’uburyo bwo kubaho gitwari ku isi, mu kubanira neza abatemera nk’aho ari abavandimwe (2,11–25; 3,1–12; 4,7.11); bityo rero «nimuhore mwiteguye guha igisubizo umuntu wese uzagira icyo ababaza ku byerekeye ukwizera kwanyu» (3,15).
Uretse ibyo tumaze kuvuga, muri iyi baruwa, hari Uvugwa hose, agasumba byose: ni Kristu Nyagasani, we Ntore y’Imana.
