Ibaruwa ya mbere ya Yohani
IJAMBO RY’IBANZE
Uretse Ivanjili, uruhererekane rw’abakristu ba mbere rwatugejejeho kandi amabaruwa atatu na yo akomoka kuri Yohani. Ayo mabaruwa asa rwose n’Ivanjili ya kane, ari mu mvugo, ari mu nyigisho, ku buryo nta washidikanya kuyitirira Yohani intumwa.
Iyi baruwa ya mbere, ni ibaruwa ya gishumba yandikiwe amakoraniro y’abakristu bo muri Aziya, bari batangiye gucogozwa n’abahakanyi.
Ingingo zimwe z’iremezo ziri mu Ivanjili ya kane, usanga zigaruka muri iyi baruwa. Cyakora ntizitondekanije neza, ndetse zimwe zigenda zisubirwamo, nk’izi ngizi: Imana ni Urumuri, natwe tugomba kubaho mu rumuri (1,5—2,11); Imana ni Urukundo, natwe tugomba gukundana (2,3–1; 3,11–24; 4,7–21); Imana ni Intungane, natwe tugomba kuba intungane (2,29—3,10).
Kuri izo ngingo zigenda zigaruka kenshi, hiyongeraho n’izindi nk’izi: kwemera Yezu ari we Kristu Umwana w’Imana (5,1–13), kwemera kuyoborwa na Roho Mutagatifu, kwirinda icyaha, kwirinda abarwanyakristu, kwirinda isi (4,1–6), gusabira abanyabyaha (5,14–17), kubaho mu bwizere ko turi abana b’Imana, maze kuri ubwo buryo tukaba twaranyuze mu rupfu tugana mu bugingo.
Biraruhije kumenya niba iyi baruwa yaranditswe mbere cyangwa nyuma y’Ivanjili ya kane.
